ᑭᓲᕙ ᐊᔪᖅᓴᓗᐊᕐᓂᖅ

Facilitator Login

Forgotten Password?

ᐊᔪᖅᓴᓗᐊᕐᓂᖅ ᓄᓇᕗᒻᒥ

 

ᓯᓚᕐᔪᐊᒥ ᓄᓇᖃᖅᑐᓄᑦ ᑲᑎᒪᔨᕋᓛᖑᔪᑦ ᐱᕙᓪᓕᐊᔪᓕᕆᓂᒃᑯᑦ, ᐃᓅᓯᓕᕆᓂᒃᑯᑦ ᐊᒻᒪ ᐃᓕᖅᑯᓯᕐᒥᒍᑦ ᐱᔪᓐᓇᐅᑎᖓᑦ ᐊᔪᖅᓴᓗᐊᕐᓂᕐᒥᒃ ᑐᑭᓕᐅᕆᓯᒪᒻᒪᑦ ᐃᒪᐃᑦᑐᒥᒃ:

 

[ᐊᔪᖅᓴᓗᐊᕐᓂᖅ] ᑎᒥᖃᖅᑐᓄᑦ ᐆᒪᔪᓄᑦ ᓇᓗᓇᐃᖅᑕᐅᓯᒪᔪᖅ ᐊᔪᖅᓴᖅᑐᓄᑦ ᐃᑲᔪᕈᑎᒃᓴᐅᔪᓂᒃ, ᐱᔪᓐᓇᕐᓂᐅᔪᓂᒃ, ᓇᓖᕋᕐᕈᓐᓇᕐᓂᕐᒧᑦ, ᐊᑦᑕᓇᐃᖅᓯᒪᓂᕐᒧᑦ ᐊᒻᒪ ᓴᓐᖏᓂᖃᕐᓂᕐᒧᑦ ᑕᒪᒃᑯᐊ ᐱᑕᖃᕆᐊᖃᖅᑎᓪᓗᒋᑦ ᖁᕕᐊᓇᖅᑐᒥᒃ ᐃᓅᓯᖃᕐᓂᕐᒧᑦ ᐊᒻᒪ ᐊᓯᖏᑦ ᐃᓕᖅᑯᓯᒃᑯᑦ, ᑮᓇᐅᔭᓕᐅᕐᓂᒃᑯᑦ, ᓂᕈᐊᖅᓯᖃᑦᑕᕈᓐᓇᕐᓂᕐᒧᑦ ᐊᒻᒪ ᐃᓅᓯᓕᕆᓂᕐᒧᑦ ᐱᔪᓐᓇᐅᑎᓄᑦ.

 

ᓇᓗᓇᐃᖅᓯᒪᑦᑎᐊᓂᖅᓴᖅ ᐊᔪᖅᓴᓗᐊᕐᓂᐅᔪᖅ ᐊᑐᐃᓐᓇᐅᑎᑕᐅᔪᖅ ᓯᓚᕐᔪᐊᒥ ᑲᑎᒪᔨᕐᔪᐊᓄᑦ ᐱᕙᓪᓕᐊᓂᕐᒧᑦ ᑎᒥᖁᑎᖓᓄᑦ:

 

ᑐᑭᓕᐅᖅᑕᐅᓯᒪᒐᔪᑦᑐᑦ ᐊᔪᖅᓴᓗᐊᕐᓂᕐᒧᑦ ᐃᒪᐃᑦᑐᓂᒃ ᐃᓱᒪᒋᔭᐅᒐᔪᑦᑐᑦ ᖃᓄᑎᒋᑦ ᑮᓇᐅᔾᔭᒃᓴᓂᖏᓐᓄᑦ ᐅᕝᕙᓗ ᑮᓇᐅᔾᔭᒃᓴᕕᖃᓐᖏᓐᓂᖏᓐᓄᑦ. ᑭᓯᐊᓂᑦᑕᐅᖅ ᐊᔪᖅᓴᓗᐊᕐᓂᐅᔪᖅ ᐃᓗᓕᖃᕐᒥᔪᖅ ᐃᓕᓐᓂᐊᕆᐊᕈᓐᓇᖏᓐᓂᕐᒧᑦ, ᐋᓐᓂᐊᕕᓕᐊᖅᑐᖅᓯᐅᑎᖃᓐᖏᓐᓂᕐᒧᑦ ᐅᕝᕙᓗ ᐃᒥᑦᑎᐊᕙᒻᒥ ᐃᒥᕋᒃᓴᖃᓐᖏᓐᓂᕐᒧᑦ, ᐅᕝᕙᓗ ᐊᑦᑐᐃᓂᖃᕈᓐᓇᖏᓐᓂᕐᒧᑦ ᓂᕈᐊᕈᓐᓇᖅᐸᑦᑐᓄᑦ ᐊᒻᒪ ᐊᓯᖏᓐᓂᒃ ᓱᖁᑎᒋᔭᐅᔪᑦ ᐃᓄᓐᓄᑦ.

 

ᐊᐅᓪᓗᔾᔨᓂᖅ ‘ᐱᔾᔪᑎᒋᓪᓗᐊᑕᖅᑕᖏᑦ’ ᐊᒻᒪ ‘ᐱᖁᑎᒋᔭᐅᔪᑦ’

ᐱᒋᐊᕈᑎᖓ ᓄᓇᕗᑉ ᐱᓕᕆᐊᕆᓇᓱᒃᑕᖓᓄᑦ ᐋᔪᖅᓴᓗᐊᖅᑕᐃᓕᒪᑎᑦᑎᓂᕐᒧᑦ ᐅᕘᓈᖓᔪᖅ ᑲᒪᓂᕐᒥᑦ ᑭᓱᒧᑦ ᐱᒋᐊᕈᑎᖃᖅᓯᒪᖕᒪᖔᖅ. ᐃᓱᒪᒃᓴᖅᓯᐅᕈᑎᒃᓴᑦᑎᐊᕙᐅᔪᖅ ᑖᔅᓱᒥᖓ ᑐᑭᓯᐅᒪᓂᕐᒥᑦ ᐆᓇᐅᔪᖅ ‘ᐃᓄᖕᓂᑦ ᑭᑭᑦᑎᓂᕐᒥᑦ’ - ᐃᓄᐃᑦ ᑕᒪᐃᑎᒍᑦ ᐃᓚᐃᓐᓇᖓᒍᓪᓘᓐᓃᑦ ᓄᖅᑲᖓᑎᑕᐅᔪᑦ ᑮᓇᐅᔭᓕᐅᕐᓂᕐᒥᑦ ᐊᒻᒪ ᐃᓕᖅᑯᓯᓕᕆᓂᕐᒥᑦ. ᓄᓇᕗᒻᒥ, ᐃᓄᖕᓂᑦ ᑭᑭᑦᑎᓂᖅ ᐃᓚᖃᖅᑐᖅ ᐅᖃᐅᓯᕐᒥ ᑐᑭᓯᐅᒪᙱᓐᓂᕐᒥᑦ, ᐃᓕᓐᓂᐊᕐᓂᕐᒥᑦ ᐱᕕᖃᖅᑎᑕᐅᓂᕐᒥ,  ᖃᕆᓴᐅᔭᕐᒨᖓᔪᓂᑦ ᐊᑐᐃᓐᓇᖃᕐᕕᐅᓂᕐᒥᑦ, ᐊᐅᓚᑕᐅᓂᕐᒧᑦ ᐊᒻᒪ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᑦ ᐊᒃᓱᕉᑕᐅᔪᓂᑦ, ᐊᒻᒪ ᐃᓚᐅᖃᑦᑕᕐᓂᖅ ᒐᕙᒪᓕᕆᓂᕐᒧᑦ ᐋᖅᑭᒃᓱᖅᑕᐅᔪᑦ ᐊᒃᑐᐃᓂᖃᖅᑐᑦ ᑭᒃᑯᑐᐃᓐᓇᕐᓂᑦ.

 

ᑖᓐᓇ ᒪᑭᒪᓂᖅ ᐸᕐᓇᐅᑎᖓ: ᐱᓕᕆᖃᑎᒌᓂᒃᑯᑦ ᐊᔪᖅᓴᓗᐊᖅᑕᐃᓕᒪᑎᑦᑎᓂᕐᒧᑦ ᓴᖅᑭᑕᐅᔪᖅ ᑭᒃᑯᑐᐃᓐᓇᕐᓄᑦ ᐅᖃᓪᓚᐅᓯᐅᖃᑦᑕᖅᑐᓂ ᐊᕐᕌᒎᒃ ᒪᕐᕉᒃ ᐅᖓᑖᓄᑦ. ᑖᓐᓇ ᐸᕐᓇᐅᑎ ᐊᖏᕈᑕᐅᓯᒪᖕᒪᑦ ᐱᒻᒪᕆᐅᓂᖓ ᐊᑐᓕᖅᑎᑦᑎᓇᓱᓐᓂᕐᒥ ‘ᓇᒻᒥᓂᖅᓱᕐᓂᕐᒥᑦ’ ᓇᓗᓇᐃᖅᑕᐅᓯᒪᔪᖅ ᐸᕐᓇᐅᑎᒥᑦ. ᐊᔾᔨᒌᙱᑦᑑᑎᓂᑦ ᐱᔾᔪᑎᒃᓴᖅᑕᖃᕐᓂᖑᓄᑦ ‘ᓱᒃᑰᑎᑦᓯᓂᕐᒥᑦ’, ᑭᒃᑯᑐᐃᓐᓇᕐᓄᑦ ᐊᒻᒪ ᓇᒻᒥᓂᕆᔭᐅᔪᑦ ᐱᓕᕆᐊᒃᓴᐅᔪᑦ ᐊᒻᒪ ᐱᔨᑦᑎᕋᐅᑏᑦ ᐱᓕᕆᐊᖃᖅᑐᑦ ᐊᔾᔨᒌᙱᑦᑐᓂᑦ ᐱᔭᐅᔭᕆᐊᓕᓐᓂ (ᐱᖓᓲᔪᖅᑐᑦ ᐊᕕᑦᑐᖅᓯᒪᓃᑦ ᒪᑭᒪᓂᐅᑉ ᐸᕐᓇᐅᑎᖓᓂ) ᐱᓕᕆᓂᖃᕆᐊᓖᑦ ᑭᑭᑕᐅᔪᖃᙱᑦᑐᒃᑯᑦ. ᑭᑭᑦᑎᖏᓪᓗᓂ ᐃᓱᒪᓕᐅᓂᕐᒥᑦ ᐱᐅᓂᖅᓴᐅᖕᒪᑦ, ᒪᑭᒪᑎᑦᓯᓂᖅᓴᐅᓕᖃᑦᑕᕐᒪᑦ ᐃᖏᕐᕋᓂᖃᐃᓐᓇᕐᓗᓂ ᓯᕗᓪᓕᐅᔾᔭᐅᔭᕆᐊᓕᓐᓂ ᐊᓯᔾᔩᑦᓯᐊᕐᓂᕐᒧᑦ.

 

ᐊᐅᓪᓗᔾᔭᐅᓗᐊᕐᓗᑎᒃ ᓲᕐᓗ ᒪᓐᖑᖏᑦ ᑕᐃᒃᑯᐊ ᒪᒥᓴᖅᐸᓪᓕᐊᔪᓐᓇᕐᓗᑎᒃ ᐋᓐᓂᖅᓯᒪᔪᑦ ᓄᓇᓕᓐᓄᑦ ᓄᒃᑎᖅᑕᐅᕙᓪᓕᐊᓕᖅᑎᓪᓗᒋᑦ. ᑕᕝᕙᓂ, ᒪᒥᓴᕐᓂᖅ ᐅᖃᐅᓯᖃᖅᑐᖅ ᐅᑎᖅᑎᑦᑎᕙᓪᓕᐊᓂᕐᒧᑦ ᐊᒻᒪ ᐋᖅᑭᒃᓱᐃᕙᓪᓕᐊᓂᕐᒧᑦ ᐃᓄᐃᑦ ᐃᓅᓯᖏᓐᓂᒃ ᑕᒪᒃᑯᐊ ᐃᓄᖏᑦ ᐃᒻᒥᓂᒃ ᑲᔪᖏᕐᓂᖃᑦᑎᐊᓕᕈᓐᓇᖁᓪᓗᒋᑦ ᖃᓄᐃᑦᑐᑐᐃᓐᓇᕐᓂᖅ ᐃᓕᖅᑯᓯᒃᑯᑦ, ᐃᖅᑲᓇᐃᔭᕐᓂᒃᑯᑦ ᐊᒻᒪ ᓂᕈᐊᖅᑕᐅᓯᒪᓂᐅᔪᑦ, ᐱᖃᓯᐅᑎᓗᒋᑦ ᐃᓱᒪᐃᓐᓇᕿᔪᓐᓇᖁᓪᓗᒋᑦ ᓄᓇᒧᑦ ᐊᐅᓪᓚᕈᓐᓇᓂᕐᒧᑦ ᐊᒻᒪ ᖃᑭᑎᑦᑎᑲᓐᓂᕋᓱᓐᓂᕐᒧᑦ ᐃᓄᐃᑦ ᓯᕗᓕᖅᑎᐅᕙᓚᐅᕐᓂᖏᓐᓂᒃ ᑕᒪᓐᓇᓗ ᐃᒻᒥᒧᑦ ᐃᓅᑦᑎᐊᕈᑕᐅᔪᓐᓇᕐᒪᑕ, ᐃᓚᒌᓄᑦ ᐊᒻᒪ ᓄᓇᓕᓐᓄᑦ. ᑕᕝᕗᖓ, ᐊᑕᖐᓂᖅ ᐊᒻᒪ ᑲᑐᔾᔨᓗᑎᒃ ᑲᒪᓂᕐᒧᑦ ᓄᓇᕗᒻᒥ ᐱᕙᓪᓕᐊᔭᐅᓂᖓ ᐊᔪᖅᓴᓗᐊᖅᑐᓕᕆᓂᕐᒧᑦ ᐸᕐᓇᒍᑕᐅᔪᖅ ᖃᑭᑎᑦᑎᕙᓪᓕᐊᓇᓱᐊᕐᒪᑦ ᓄᓇᓕᓐᓂ ᑎᒥᐅᔪᒧᑦ ᑲᑐᔾᔨᖃᑎᒌᒧᓪᓗ.

 

ᐊᐅᓪᓗᔾᔭᐅᓂᖓ ᐱᖁᑎᐅᓂᕋᖅᑕᐅᔪᖅ ᑐᑭᖃᖅᑐᖅ ᐊᓯᔩᕙᓪᓕᐊᓂᖅ ᐊᑐᕐᓗᒋᑦ ᒫᓐᓇ ᐊᑐᐃᓐᓇᐅᔪᑦ ᓴᓐᖏᓂᐅᔪᑦ ᑲᔪᖏᕈᑕᐅᒃᑲᓂᕐᓂᐊᖅᑐᓂᒃ ᐊᔪᖅᓴᓗᕐᓂᑕᖃᓐᖏᓂᖅᓴᐅᖁᓪᓗᒍ. ᐱᖁᑎᒋᔭᐅᔪᑦ ᐱᖃᓯᐅᔾᔨᔪᖅ ᑕᒪᒃᑯᓂᖓ ᑕᖏᓕᓐᓂ ᑭᓱᓂᒃ ᐊᒻᒪ ᐱᔨᑦᑎᕈᑕᐅᔪᓂᒃ ᐃᓄᓐᓄᑦ ᐱᓯᒪᔭᐅᔪᓄᑦ ᐅᓪᓗᒥᐅᔪᖅ, ᐊᒻᒪ ᐃᓄᐃᑦ ᐃᓕᖅᑯᓯᖏᓐᓂᑦ, ᐱᓗᐊᖅᑐᒥᓪᓗ ᓄᓇᑦᑎᓐᓂ ᓂᕆᐅᒋᔭᐅᔪᓄᑦ ᐱᕙᓪᓕᐊᓂᐊᖅᑐᑦ ᑐᓐᖓᕕᖃᕐᓗᑎᒃ ᐃᓄᐃᑦ ᑭᒃᑰᓂᖏᓐᓂᒃ. ᐃᒫᒃ ᐅᖃᒃᑲᓂᕐᓗᒍ ᐊᐅᓪᓗᔭᐅᓂᖓ ᐱᖁᑎᒋᔭᐅᔪᓄᑦ ᑐᑭᖃᖅᑐᖅ ᐊᑲᐅᔪᒧᑦ ᐊᓰᔾᔨᕐᓂᖅ ᓴᖅᑭᕐᓗᓂ ᓄᓇᓕᓕᒫᓂᑦ.