ᑲᑐᔾᔨᖃᑎᒌᓐᓂᒃ ᐊᒻᒪ ᓄᓇᓕᐅᔪᑦ ᐃᓚᐅᓂᖏᑦ

Facilitator Login

Forgotten Password?

ᓄᓇᕗᒻᒥᐅᑦ ᖃᐅᔨᒪᑦᑎᐊᖅᐳᑦ ᐃᓕᓐᓂᐊᖅᓯᒪᑦᑎᐊᕐᓂᖅ ᐃᖅᑲᓇᐃᔮᖃᑦᑎᐊᓂᕐᒧᑦ ᐃᑲᔪᕈᓐᓇᑦᑎᐊᓂᕐᒧᓪᓗ ᑎᑭᐅᑎᕙᒻᒪᑦ. ᓂᕆᐅᒃᑐᒐᓴᐅᕙᑉᐳᑦ ᐊᒥᓱᑦ ᐃᓕᓐᓂᐊᖅᑎᖁᑎᕗᑦ ᐊᒥᓲᓂᖅᓴᐃᑦ ᐃᓱᓕᑉᐸᓪᓕᐊᓂᐊᖅᑐᑦ ᖁᕝᕙᓯᓐᓂᖅᓴᒧᓪᓗ ᐃᓕᓐᓂᐊᕆᐊᒃᑲᓂᕐᓗᑎᑦ ᑮᓇᐅᔭᓕᐅᖅᑎᑦᑎᐊᕙᐅᓕᕐᓗᑎᓪᓗ ᐃᓅᖃᑎᒥᓄᓪᓗ ᐱᕚᓪᓕᖅᑎᑦᑎᓗᑎᑦ.

ᖄᒃᑲᓐᓂᐊᒍᑦ ᐃᓄᐃᑦ ᐅᖃᐅᓯᖓᑦ ᐅᖃᐅᓯᓪᓚᕆᒋᔭᐅᒻᒪᑦ ᐊᒥᓲᑕᐅᓂᖅᓴᓄᑦ ᓄᓇᕗᒥᐅᓄᑦ ᐃᓄᒃᑎᑑᕈᓐᓇᕐᓂᖅ ᑎᑎᕋᕈᓐᓇᓂᕐᓗ ᐱᔭᕆᐊᖃᓪᓚᕆᑉᐳᑦ ᓄᓇᕗᒻᒥᐅᑦ ᐊᔪᕈᓐᓃᕈᑎᖃᑦᑎᐊᕐᓂᐊᕈᑎᑦ ᐃᑲᔪᖃᑕᐅᖃᑦᑕᓂᐊᕐᓂᕐᒧᑦ.

ᑕᒪᑐᒪᓂ ᐅᖃᖃᑎᒌᓐᓂᑦᑎᓐᓂ ᓇᓗᓇᐃᖅᓯᓚᐅᖅᐳᒍᑦ ᑕᐅᑐᒐᑦᑎᓐᓂ ᓄᓇᓕᖁᑎᑦᑎᓐᓄᑦ ᑎᑭᐅᑎᓂᐊᕈᑦᑕ ᐊᔪᖅᓴᕐᓂᖃᕈᓐᓃᖁᓪᓗᒍ ᐅᑯᓂᖓ ᑐᕌᒐᓂᑦ ᑎᑭᑕᐅᔪᒃᓴᓂᓪᓗ ᐱᓇᓱᒋᐊᖃᕐᓂᐊᖅᑐᒍᑦ:

A. ᓱᕈᓯᓛᓄᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᓕᐅᑦᑎᐊᕐᓂᖅ

ᓱᓕ ᑐᓐᖓᕕᒃᓴᖅ ᐱᓕᕆᐊᖑᔭᕆᐊᖃᖅᐳᖅ ᓱᕈᓯᓛᓂᑦ ᐃᓕᓐᓂᐊᕐᓂᕐᒨᖓᔪᒥᒃ.

ᐃᑲᔪᕐᓂᐊᖅᐳᒍᑦ ᓱᕈᓯᓛᓂᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᓕᐅᕐᓂᕐᒥᒃ ᐊᑕᖏᐅᒪᒋᐊᖅᑐᒥᒃ, ᓄᓇᕘᓕᒫᒥ ᐃᒪᐃᓕᖓᓕᖁᓪᓗᒍ ᐊᑕᐅᖏᐅᒪᔪᖅ ᐃᓕᓐᓂᐊᕐᕕᓐᓂᑦ, ᐃᓕᓐᓂᐊᕈᑎᓂᑦ ᐃᖅᑲᓇᐃᔭᖅᑎᓄᓪᓗ ᐃᓕᓐᓂᐊᕐᓂᖅ ᐃᑲᔫᑎᖃᕐᓂᕐᓗ.

B. ᐊᖓᔪᖅᑳᕆᔭᐅᔪᓄᑦ ᐃᑲᔫᑎᖃᒃᑲᓐᓂᕐᓂᖅ

ᓄᓇᓕᓐᓂ ᑲᑎᒪᓂᐅᖃᑦᑕᓚᐅᖅᑐᓂ ᐊᒥᓱᑦ ᐅᖃᖅᐸᓚᐅᖅᐳᑦ ᐊᖓᔪᖅᑳᕆᔭᐃᑦ ᐃᓕᓴᐃᑦᑎᐊᕙᓚᐅᖅᓯᒪᓂᖏᓐᓂᑦ ᕿᑐᕐᖓᒥᓂᑦ, ᐅᖃᐅᓯᖃᖅᑐᑎᓪᓗ ᖃᓄᐃᒻᒪᑦ ᐃᓚᖏᑦ ᐃᓚᐅᓐᖏᓗᐊᖅᐸᓕᕐᒪᖔᑕ ᕿᑐᕐᖓᖏᑕ ᐃᓕᓐᓂᐊᕐᓂᖏᓐᓂᑦ.

ᐃᑲᔪᕐᓂᐊᖅᐳᒍᑦ ᐃᓚᒌᓄᑦ ᑎᑎᕋᕈᓐᓇᕈᑎᓂᑦ ᐃᓄᒃᑎᑐᑦ ᐊᒻᒪ ᐊᑐᕈᓐᓇᐅᑎᓕᐅᕈᑎᒋᓗᒋᑦ ᐃᓕᓐᓂᐊᕈᑎᓂᓪᓗ. ᖄᒃᑲᓐᓂᐊᒍᑦ ᐃᑲᔪᕐᓂᐊᖅᐳᒍᑦ ᕿᑐᕐᖓᖃᕐᓂᕐᒥᒃ ᐃᓕᓐᓂᐊᕈᑎᓂᑦ ᐱᔨᑦᑎᕋᐅᑎᓂᓪᓗ.

C. ᐃᖅᑲᓇᐃᔭᖅᑎᓕᕆᓂᖅ

ᐃᓄᓕᒫᖅᑎᑦᑎᓂᒃᑯᑦ ᑲᑎᒪᖃᑕᐅᕙᓚᐅᖅᑐᑦ ᐅᖃᐅᓯᖃᖅᐸᓚᐅᖅᐳᑦ ᐊᕝᕕᐊᕈᑕᐅᕙᒃᑐᓂᑦ ᐃᖅᑲᓇᐃᔮᒥ ᓱᕗᒧᐊᕈᓐᓇᓂᕐᒥᒃ, ᐱᓗᐊᖅᑐᒥᒃ ᐃᓕᓐᓂᐊᕐᓂᑭᓗᐊᕐᓂᕐᒧᑦ ᓯᕗᒧᐊᕈᓐᓇᐃᓕᒍᑕᐅᕙᓐᓂᖓ. ᐊᒻᒪᓗ ᐃᑲᔪᕐᓂᐊᖅᐳᒍᑦ ᐃᓕᓐᓂᐊᕈᑎᑕᖃᓕᖁᓪᓗᒍ ᐊᔪᓐᖏᔾᔪᓯᑐᖃᓐᓂᒃ ᐃᓄᒃᑎᑑᕈᓐᓇᑦᑎᐊᓂᕐᒥᓪᓗ.