ᒪᑭᒪᓂᕐᒧᑦ ᐸᕐᓇᒍᑎ

Facilitator Login

Forgotten Password?

ᐃᓕᖅᑯᓯᖃᑎᒌᒍᑕᐅᒐᔭᖅᑐᖅ ᐊᔪᖅᓴᓗᐊᖅᑕᐃᓕᒋᐊᖅᑎᑦᑎᓂᕐᒧᑦ

1. ᐱᒋᐸᕈᑎᖓ

ᐅᑐᐱᕆ 18, 2010-ᖑᑎᓪᓗᒍ, ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᑐᓴᖅᑎᑦᑎᓚᐅᖅᓯᒪᕗᑦ ᐃᓄᓕᒫᓂᑦ ᐃᓚᐅᑎᑦᑎᓂᒃᑯᑦ ᑲᑎᒪᓂᖃᖅᑎᑦᑎᖃᑦᑕᓂᐊᕐᓂᕐᒥᓂᑦ ᐸᕐᓇᐅᑎᓕᐅᕈᑕᐅᓂᐊᖅᑐᓂᑦ ᐊᔪᖅᓴᓗᐊᖅᑕᐃᓕᒪᒋᐊᕐᓂᕐᒧᑦ.

ᑕᒪᑉᑕ ᐸᕐᓇᐅᑎᒥ, ᓄᓇᕗᑦ ᒐᕙᒪᒃᑯᑦ ᐃᓕᓴᖅᓯᓚᐅᖅᐳᑦ ᐱᓕᕆᐊᕆᔭᐅᒋᐊᖃᓪᓚᕆᓐᓂᖓᓂᒃ ᐊᔪᖅᓴᓗᐊᖅᑐᓕᕆᓂᖅ, ᐊᒻᒪ ᐃᓕᓴᖅᓯᓪᓗᑎᑦ ᑕᒪᒃᑯᐊ ᐱᓕᕆᖃᑎᒌᓐᓂᒃᑯᑦ ᖃᓄᖅᑑᕈᑕᐅᓇᓱᒋᐊᖃᕐᓂᐊᕐᒪᑕ. ᐊᔪᖅᓴᓗᐊᕐᓂᐅᑉ ᐱᔾᔪᑎᖃᖅᐳᑦ ᐊᔾᔨᐅᓐᖏᓐᓂᖏᑦ ᐃᓄᐃᑦ ᐊᐅᓚᒍᓯᖏᑦ ᐊᒻᒪ ᐅᓪᓗᒥᐅᓕᖅᑐᖅ ᐊᐅᓚᒍᓯᒋᕙᓕᖅᑕᑎᓐᓂ ᓄᓇᕘᒥ. ᑖᒃᑯᐊ ᐊᑐᖅᑕᐅᓕᓚᐅᖅᐴᒃ ᑕᒪᕐᒥᒃ ᓄᓇᓕᐸᐅᔭᖅᑕᖃᓕᕐᒪᑦ ᓱᓕᓗ ᑐᑭᓕᐊᖅᑎᑕᐅᓯᒪᓇᑎᒃ. ᐱᓕᕆᖃᑎᒌᑦᑎᐊᕐᓂᒃᑯᑦ ᑕᒪᓐᓇ ᑐᑭᓕᐊᓕᖅᑎᑕᐅᓂᐊᖅᐳᖅ ᐃᓄᑐᐃᓐᓇᐃᓪᓗ ᐅᑎᕈᓐᓇᖅᓯᑎᑕᐅᓗᑎᑦ ᐋᖅᑮᖃᑦᑕᕐᓂᕐᒧᑦ. ᑕᒪᓐᓇ ᐊᖅᑯᑎᐅᕗᖅ ᓇᒻᒥᓂᖅ ᒪᑭᒪᔪᓐᓇᓂᕐᒧᑦ, ᒪᒥᓴᐃᓂᕐᒧᑦ ᐊᔪᖅᓴᓗᐊᕐᓂᐅᑉ ᐱᔾᔪᑎᒻᒪᕆᖏᓐᓂᑦ.

ᐊᕐᕌᒍᕆᔭᑦᑎᓐᓂ ᐊᔪᖅᓴᓗᐊᖅᑐᖃᕈᓐᓃᕐᓂᕐᒧᑦ ᑲᑎᒪᓂᖅᑕᖃᓚᐅᖅᐳᖅ ᐊᒥᓱᓂᑦ ᓄᓇᕘᓕᒫᒥ. ᐅᖃᖃᑎᖃᕐᓂᖃᓚᐅᖅᐳᒍᑦ ᐊᒡᒍᑐᖅᑕᐅᓯᒪᕙᓚᐅᖅᑐᑎᑦ ᖃᐅᔨᒪᔩᑦ ᐊᒻᒪ ᐃᓱᒪᓕᐅᖅᐸᒃᑐᑦ ᐊᑐᖅᑕᐅᔪᓐᓇᖅᑐᓂᑦ ᖃᓄᖅᑑᕈᑕᐅᔪᓐᓇᖅᑐᓂᓪᓗ. ᐊᑕᐅᒃᓯᒃᑰᖅᑎᑕᐅᑉᐸᑕ ᑕᒪᒃᑯᐊ ᖃᓄᖅᑑᕈᑕᐅᖁᔭᐅᔪᐃᑦ, ᐊᔾᔨᒌᓐᖏᕈᓘᔭᖅᑐᐃᑦ ᐊᑐᖅᑕᐅᓕᕋᔭᖅᐳᑦ ᐊᔪᖅᓴᓗᐊᕈᓐᓃᖅᑐᖃᓕᖁᓪᓗᒍ ᓄᓇᕗᒻᒥ.

ᑕᒪᓐᓇᓗ ᑲᔪᓯᓂᖃᖅᓯᒪᕗᖅ ᐃᓄᓕᒫᑎᖅᑎᖅᑎᓂᑎᒍᑦ. ᐃᓄᓕᒫᖅᑎᑦᑎᓂᒃᑯᑦ ᓄᓇᓖᑦ ᓂᐱᖅᑯᖅᑐᒋᐊᖅᑎᑕᐅᓯᒪᕗᑦ ᓄᓇᓕᓐᓃᖔᖅᑐᒥᒃ ᓄᓇᕘᓕᒫᒧᑦ. ᑕᒪᑐᒨᓇᓗ ᓄᓇᓖᑦ ᓴᓐᖏᓂᖅᑎᑖᕆᐊᖅᑎᑕᐅᕙᓪᓕᐊᕗᑦ ᓄᓇᓖᑦ ᐅᖃᖃᑎᒌᓐᓂᑎᒍᑦ ᓄᓇᕘᓕᒫᒥ ᑐᓐᖓᕕᒋᔭᐅᓪᓗᑎᓪᓗ ᐊᕕᑦᑐᓯᒪᔪᓂ ᑲᑎᒪᓂᐅᔪᓂᑦ. ᑕᒪᒃᑯᐊᓗ ᐊᕕᑦᑐᖅᓯᒪᔪᓂ ᑲᑎᒪᓃᑦ ᑐᓐᖓᕕᒋᔭᐅᓚᐅᖅᐳᑦ ᐊᔪᖅᓴᓗᐊᖅᑐᓕᕆᓂᕐᒧᑦ ᑲᑎᒪᓂᕐᔪᐊᒧᑦ ᑕᕝᕗᖓᓗ ᑎᑎᖅᑲᐅᑉ ᐃᓗᓕᖏᓐᓄᑦ.

ᒫᓐᓇ ᐱᖃᑕᐅᓪᓗᑕ ᓯᕗᓪᓕᖅᐹᑦᑎᐊᒥᒃ ᓄᓇᕗᒻᒥ ᐊᔪᖅᒪᓗᐊᖅᑐᓕᕆᓂᕐᒧᑦ ᑲᑎᒪᓂᕐᔪᐊᒥ ᐃᖃᓗᓐᓂ ᓄᕕᐱᕆ 28-ᒥᒃ 30-ᒧᑦ, 2011 ᑲᑐᔾᔨᓂᖃᖅᑐᑕ ᐊᔪᖅᓴᓗᐊᖅᑕᐃᓕᒪᑎᑦᑎᒋᐊᕐᓂᕐᒧᑦ ᓴᖅᑭᓚᐅᖅᑕᕗᑦ ᒪᓂᑲᓂᖅ ᐸᕐᓇᐅᑎᒃ. ᑕᒪᓐᓇ ᐸᕐᓇᐅᑎᒃ ᐊᖅᑯᑎᒃᓴᓕᐅᕈᑎᐅᓇᓱᒃᐳᖅ ᓄᓇᕘᒥ ᐊᔪᖅᓴᕐᓂᖃᕈᓐᓃᖁᓪᓗᒍ ᐱᓕᕆᖃᑎᒌᓐᓂᒃᑯᑦ ᒪᒥᓴᐃᓂᒃᑯᓪᓗ.

ᑲᑎᓪᓗᒋᑦ ᐱᖁᑎᒋᔭᕗᑦ, ᒪᑭᒪᓂᖅ ᐸᕐᓇᐅᑎᑎᒍᑦ ᑲᑐᔾᔨᓂᕆᕙᕗᑦ ᐃᓘᓐᓇᓯᓐᓄᑦ - ᒐᕙᒪᓄᑦ, ᐃᓄᐃᑦ ᑎᒥᖁᑎᖏᓐᓄᑦ, ᒐᕙᒪᐅᓐᖏᑦᑐᑦ ᑎᒥᐅᔪᓄᑦ, ᓇᒻᒥᓂᖃᖅᑎᓄᑦ ᐊᒻᒪ ᐃᓄᑐᐃᓐᓇᕐᓄᑦ, ᑕᐃᒃᑯᐊᓗ ᐊᔪᖅᓴᖃᑦᑕᖅᓯᒪᓂᑯᐃᑦ.

ᐸᕐᓇᐅᑎᒥ ᐱᖓᓲᔭᖅᑐᑦ ᐱᓪᓗᐊᑕᐃᑦ ᓇᓗᓇᐃᖅᑕᐅᓯᒪᕗᑦ ᓄᓇᕘᒥ ᐃᓕᖅᑯᓯᐅᓂᐊᖅᑐᓂᑦ ᐊᔪᖅᓴᓗᐊᖅᑕᐃᓕᒋᐊᖅᑎᑦᑎᓇᓱᓐᓂᐊᕐᓂᕐᒧᑦ, ᐊᒻᒪᓗ ᓯᕗᓪᓕᐅᔾᔭᐅᖁᔭᐅᔪᓂᑦ ᖃᓄᖅᑑᕈᑎᒃᓴᓕᐊᖑᓯᒪᔪᑦ ᑕᖅᑭᐅᓂᐊᖅᑐᓂᑦ 18-ᓂᑦ. ᐃᓕᓴᕆᕙᕗᑦ ᑕᒪᓐᓇ ᐃᓘᓐᓇᓯᓐᓄᑦ ᐸᕐᓇᐅᑎᐅᔭᕆᐊᖃᕐᓂᐊᕐᒪᑦ, ᐊᖏᖅᓯᒪᓪᓗᑕᓗ ᕿᒥᕐᕈᓂᐊᕐᓗᒍ ᑎᒥᖁᑎᑦᑎᓐᓂ ᓇᓗᓇᐃᒃᑲᓐᓂᕐᓂᐊᕐᒪᑦ ᐊᖏᖅᓯᒪᓂᑦᑎᓐᓄᑦ ᑖᒃᑯᓄᖓ.

ᓄᓇᕘᒥ ᐃᓕᖅᑯᓯᒃ

2. ᓄᓇᕗᒻᒥ ᐃᖅᑯᓯᐅᓂᐊᖅᑐᖅ ᐊᔪᖅᓴᓗᐊᖅᑕᐃᓕᑎᑦᑎᒋᐊᕐᓂᕐᒧᑦ

ᐊᑕᖏᐅᒪᒋᐊᖅᑐᑕ ᐃᓕᖅᑯᖅᑖᓚᐅᖅᐳᒍᑦ ᐊᔪᖅᓴᓗᐊᖅᑕᐃᓕᑎᑦᑎᒋᐊᕐᓂᕐᒧᑦ ᐱᖓᓲᔭᖅᑑᓪᓗᑎᑦ ᐱᓪᓗᐊᑕᖏᑦ ᓄᐃᓚᐅᖅᑐᑦ ᐃᓄᓕᒫᓂᑦ ᐃᓚᐅᑎᑦᑎᓂᐅᓚᐅᖅᑐᒥᒃ. ᑖᒃᑯᐊ ᖃᓄᖅᑑᕈᑕᐅᔪᒃᓴᓕᐊᖑᓂᐊᖅᐳᑦ ᐊᒻᒪ ᓇᓗᓇᐃᖅᑕᐅᓯᒪᓪᓗᑎᑦ ᓄᓇᕗᒥᐅᓄᑦ. ᑖᒃᑯᐊᓗ ᐱᓪᓗᐊᑕᐃᑦ ᑕᑯᔾᔪᑎᒋᕙᕗᑦᑕᐅᖅ ᐊᑐᐊᒐᑦᑎᓐᓂᑦ ᐱᓇᓱᒍᑎᑦᑎᓐᓂᓪᓗ ᓇᓗᓇᐃᖅᓯᖁᓪᓗᑕ ᖃᓄᖅ ᐊᑑᑎᖃᕈᓐᓇᕐᒪᖔᑕ ᐊᔪᖅᓴᓗᐊᖅᑕᐃᓕᑎᑦᑎᒋᐊᕐᓂᕐᒥᒃ.